Yihaaa, Roadtrip nach Calgary und retour

--------------------------------
Bilder
Teil 1 - Vancouver bis Kamloops
Teil 2 - Kamloops bis Banff via Lake Louise
Teil 3 - Banff bis Calgary via Rockies
Teil 4 - Calgary bis Vancouver i 10 Stund

--------------------------------
So nach rund 5 Täg Abentür chömed jetzt weder News :-)

Die gross Gallerie folgt morn oder so....

Ich bin uf en Road Trip gange mit zwei Kollege (Alan und Alex -> beides Mexikaner). Ja es isch ned esoooo schlächt gsi. mer händ rächt vell Spass gha.


Losgange ischs am Ziischtig am 15. Juli 2008 am Nomitag am 2. Dete simmer go s'Auto schnappe und denn ischs ab Richtig Calgary (Alberta) gange. Mer sind via Kamloops, Revelstoke, Lake Louise, Rocky Mountains, Banff uf Calgary düüsed. Mitdebii hämmer stehts eusi Chüelbox gha wo immer gfüllt gsi isch mit Iiis, zTrinke und öppis zum Knabbere.

Nach guet 2 Stund Fahrt hämmer dänkt mer chönted in "HOPE" es Päuseli iiilegge. das hämmer au gmacht, nume hämmer zu dem Ziitpunkt noni gwüsst, dass mer d'Iifahrt uf de Freeway nümme gfended. okay, mer sind denn halt es längers Bögeli gfahre um de ganzi Chueche ume. drum simmer denn au erscht am obig am 8 in Kamloops anstatt am 6i aaacho. naja, mier sind denn uf jede Fall gad in Usgang dete und s'Kaff go unsicher mache. Also ja schön isch es dete ja ned, aber luschtig hämmers einewäg gha.

Am nögschte Morge hämmer prompt verpennt und s'erscht Mal (es söll ned s'letschte Mal wärde) uscheckt. naja, die Dame hed eus nomal vergäh und mer sind abdüüüsed Richtig Rocky Mountains. In Revelstoke hämmer euse nächschti Halt iigleid und nomal volltanked bevors denn erscht richtig hüglig worde isch.

In Lake Louise hämmer es wiiters Stöppli iigleid und händ eus uf d'Suechi nach de Bääre gmacht. gfunde hämmer leider keini, also mol scho, aber kei lebändigi. tja was sölls. nacheme churze Spaziergang am Lake Louise simmer denn wiiter gfahre uf Banff. Banff isch sones Boarderparadies zmitzt im Chueche vode Rockies. ächt schöns Plätzli dete. Ja leider hämmer euse Trip nome nach de Landcharte planed und ned au no grad nach de Hotels. Es hed sich denn usegstellt, dass mer prompt ide Hochsaison uf Banff cho sind und natürlich alles usbueched gsi isch. wow. super oder. Mer händ de doch no es "sautüüürs" hotelzimmerli gfunde (nach 2 Stund sueche!!! und 4 KM umewatschle) und sind denn au scho weder in usgang.

Am nöchschte Morge hämmer wie gehabt weder verpennt und sind denn nochli benäbled losgfahre uf Calgary. In Calgary hed sich s'Hotelzimmersueche einisch meh als en wahri Kunscht bewahrheitet. es gid in Calgary gad emal 2 Hostels und die sind, wie ier sicher ned anderscht erwarted, beidi usbueched gsi. logisch, was suscht. ja mer händ denn es "Country Motor Inn" am "A****" vo Calgary gfunde. Irgendwie 3 KM vo Downtown eweg. Am abig hämmers eifach chli im Hotel chillt, well mier doch scho rächt kabutt gsi sind, nach de lange Reise.

Am nöchschte Morge isch es denn los gange id Stadt zom go shoppe und uskuntschafte. Während mer chli dur d'city bummled sind hämmer en stopp iiigleid im Calgary Flames-Reschtorant ade 8th Avenue. Wow ächt iidrucksvoll isch das dete gsi. Nachem zmittag simmer denn uf de Calgary Tower (weiss nüme wie höch de isch, söll uf jedefall de höchschti Ussichtsturm sii vo de Wält a azahl Meter über Meer, inklusive em Bode wo er druffe stahd). Dete hämmer denn mal Calgary us enere andere Sicht chöne betrachte.


Nach es paar Souvenirs simmer denn weder is Hotel retour und denn ab in Usgang. Säge nome eis: Wenn ier mal uf Calgary gönd, denn müender eifach is Roadhouse gah (8th Avenue irgendwo). wow eifach de Wahnsinn).

Am Samschtig Morge simmer wie ned anderscht erwarted weder zspaat ufgschtande und denn losdüüüsed hei uf Vancouver.

Jo das wärs.

bis uf es wiiters Kapitel vo mier in Canada.