erschti wuche

also ich schriibe jetzt mal uf mundart. ned dass er euch no fraged was eigentlich met mer los isch nome will ich das jetzt wächsle. :-)

ja also ich bin jetzt denn bald 1 wuche da in Vancouver und es macht würkli mega spass. han scho einiges metbecho und ja es gaht scho besser mit em änglisch als no es paar täg vorher. :-) erschte erfolg zeichnet sich also ab.

das wuchenänd (sunntig) gömmer mal Whistler go unsicher mache. das isch min erschti trip und am ziiischtig folgt sogli de zweit. denn gangi met de mexikaner vom gliche ort uf en roadtrip of calgary und richtig rocky mountains für 1 wuche. hammer. han no müesse mit de schuelleiteri plaudere wäge dem, will das dörft mer eigentlich ned. mer wärs glich gsi, wenn sie nei gseid hätti, wär trotzdem gange, aber ja denn chund sie so härzig entgäge und seid, will ich ja sone guete studänt sigi (hami ja gad echli gfragt wie sie denn das überhaupt wett wüsse, bin ja erscht 1 wuche dete und mit ihre hani no keis wort gwächslet :-) ), dörf ich uf de trip gah und sie macht en usnahm. hani also nomal schwein gha.

d'schuel isch no rächt kuhl. macht ächt spass, dütsch rede isch verbote, was s'änglischlerne wesentlich vereifacht :-). also ja innerhalb vom schuelareal zumindescht. bis jetzt hämmer vill bla bla gha und einigi analyse müesse mache womer da so paar grafike händ müesse interpretiere. ja bin ned immer drus cho, aber ja es passt scho :-)

aber ja das isch ja alles guet und rächt aber überhaupt ned interessant für euch. darum jetzt weder zum wesentliche, zu dem wo spass macht. also ja han mich scho rächt guet iiigläbt. han geschter en rächte chlapf zäme gha. sind im "Cambie" gsi (einisch meh). ächt kuhl gsi. s'bier isch rächt günschtig dete. en pitcher (isch ned so gross wie ide schwiiz aber doch no easy gross) choschted öppe 10 franke. also voll easy. händ geschter sicher öppe 15 - 20 vo dene drunke (6 Jungs und 3 Ladies). also ja hed pässled. es isch rächt abgange. mer händs cheibe glatt gha und d'mexikaner sind eifach zu luschtig. glatti cheibe säg ich euch. ja macht spass und redsch würkli die ganz ziit änglisch. hed scho rächt vill schwiiizer da, aber um die mach ich wenn möglich en boge und plaudere denn halt mit irgendwelche fremde fötzle geschters sinds 4 kanadier gsi. läck sind die näbe de schueh gsi. aber gottvertooori nomal cheibe luschtigi lüüt.

was ich mega schätze isch, dass die lüüt alli so fründlich sind. da seid mer für alles und wenns no so wenig isch danke. jede wo de bus verlahd grüesst de buschauffeur und jede wone weder verlahd seid ihm danke fürs fahre. hammer. eifach hammer. ja so das wärs für de momänt.

Bilder hani no es paari uf de digitalkamera. lade die denn zume spöötere ziitpunkt ufe. ich lahs euch wüsse.

so wünsche euch no en schöne obig oder eher morge.

bis die tage :-)

Joél