tagesdubel

ja es isch eifach de hammer gsi. möchti allne no danke wo am friitig im Celler bzw. im Nelson gsi sind und met mier zäme eine duregäh händ. esch legendär gsi. eifach de hammer. werdes sicher ned vergässe. am samschtig hämmer no en chlini abschiedsparty gmacht bi mier ide hütte. esch kuhl gsi und eifach mega luschtig. han scho lang nüme so vill glached :-) alles geili sieche. Tania, Annina, Cat, Stephan, Alex, Héctor, Mohammed. er sind genial thanxxx a lot. 

es isch eifach echli komisch, wenn mer so am flughafe hocked nach 3 super mönet. alles lauft eim wie en film vor de auge nomal dure und es isch eifach schreg :) aber schön. mer erinnered sich a jedes detail und was mer alles so erläbt hed. isch eifach sensationell gsi. möcht allne lüüt danke wo ich känneglernt han und wo ich d'ziit ha chöne verbringe.

hüt hani s'goldlos zoge für de tagestubel. zerscht hed mi sone unfründliche amerikaner zämegschisse will ich mis gepäck im flüger inne a sin platz tah han, meine ja sorry wenns kei platz meh hed, denn suecht mer sich halt eine. egal. er hed sich denn weder beruhigt. guet keini 5 minute chund de nögscht ami und hed öppis zmeckere. er hed gmeint ich sölli doch bitte d'musig abschalte sie sigi zluut. luschtigerwiiis hani gar kei musig glost. super oder. hei. scheiss amis. send sowieso es unfründlichs pack, hani de iiidruck. guet d'kanadier sind natürlich eifach genial. und das isch schwirig zum toppe. aber d'amis händ s'gfühl sie heged d'wält erfunde. ächt unglaublich. am flughafe in chicago wett der niemer richtig hälfe, wenn ned weisch wo ane dass muesch. die interessierts en füechte was du da verloore hesch und das zeigeds au grad use. tzz. ja egal.

glandet bini au super ide schwiiz, alles beschtens und nüd nois hani entdeckt. ah mol de h&m in zug für d'männer händs echli besser gmacht, aber bi nüd go shoppe. suscht weissi eigentlich nüme zum brichte.

adios und ja bilder wo no fähled folged denn no..

go canucks go

Geschter bini am Vancouver Canucks pre-season game gäge d'Edmonton Oilers gsi. d'Canucks händ 2:1 gwunne und es isch eifach de hammer gsi. voll geils ambiente und wüssed ier was??? es gid kei geilere, bessere und spannendere sport als Ishockey. Fuessball, American oder Canadien Football, Golf oder was au immer, cha alles iiipacke und isch eifach nome langwiiiilig gäge Ishockey. sorry folks aber das hed jetzt eifach einisch müesse gseid siii.

so wie isch s'game gsi. amazing hani ja scho gseid. mer sind rächt wiiit obe gsi ime stadion wo guet 18'630 nase platz händ. aber es isch huere guet gsi zum luege. mer händ de pögg easy gseh und es isch eifach entertainment pur gsi. 3 schlegereie hets gäh und 3 geili goals. defo 2 für d'Canucks natürlich :-) hehe. de Goalie (Luongo und en rookie) hed en super job gmacht und es paar nice safes häregleid. es isch eifach de hammer gsi.

am beschte lueged ier morn oder so nomal da ufe blog und gönd euch d'föteli go aaluege wenn ich sie ufeglade han.

cheers from downtown vancouver and general motor stadium :-)

Grande Finale

So die wuche isch ja mal weder einiges los gsi. zerscht wie immer bitte d'föteli go beguetachte :-)

da gahts zude fotis vom Baden Powell alias "The Rock"

d'Annina und d'Valérie sind ja no bi mier gsi und händ ihres gepäck zwüscheglagered. ja und denn simmer doch no paar mal go partee mache. isch ächt kuhl gsi. am mäntig bini am Mexican Independence Day gsi. es isch ja weder mal en klassiker gsi wie eifach dass mer en risigi schlange chan umgah voreme klub zum ned müesse zwarte. tzzz. Mexican Style halt. bin denn zude tickets cho und denn hämmer no de türsteher schnell bestoche und schwups simmer im Plush inne gsi. denn ischs los gange. also ja ich han mer en gmüetliche obig gmacht mit dance und trinke und "Viva Mexico, Viva, Viva Mexico, Viva,...) singe. esch mega luschtig gsi. bin öppe de einzig gsi wo ned us mexiko cho isch. tja anyway. hed spass gmacht. mini beide kollege händs denn natürlich no total übertribe und sind de zu hertere sache cho. wos das weder her gha händ isch mer au keis rätsel anere mexiko-night. ja egal. die sind de natürlich plötzlich huere parad gsi und scho bald am flüüge gsi. irgendeinisch am morge früeh simmer denn heigange. esch easy gsi. ächt funny.

am ziischtig bini denn mit mim kanadische roomie umeghängt und sine kollege. han ja schliesslich au chli müesse änglisch rede :-) ja das isch amigs no guet. denn simmer veruse ghocked, händ öppe es bierli trunke und wasserpfiiife dampfed. super gsi. Am Donschtig bini met em alex denn is Raven eis go schnappe. es sind no 2 arbetskolleginne cho vo ihm und denn hämmer öppe eine übere durscht drunke. tja. egal. aaschlüüssend simmer denn no deheime echli go wiiter büchse und händs eifach prächtig gha. 

Am friitig hätti eigentlich en mega fetti party sölle stattfinde im bonzeviertel vo Vancouver (West-Van). Aber ja irgendwie hed sich denn usegstellt, dass das en Graduationparty vonere kanadierin isch und drum nome lüüt i ihrem jahrgang ga chönd wo mit ihre id schuel gönd. ja es wär au zu schön gsi wemmer dete no gsi wäred. d'eltere händ dere 2000$ id hand druckt und gseid sie sölli jetzt e party schmeisse. ich meine ja, nümme nüd. oder. eifach so schnell schnell 2 Tonne für en party zbecho :-) findes ja fascht echli beknackt. tzzz

Geschter (Samschtig) bini mit em Stephan und em Mohammed is Kino. "Burn after reading". Gönd de film go luege. er isch de hammer. sooo luschtig, so genial und eifach nome zum kabuttgröööle. er hed ächt niveau und denn doch weder ned. eifach go luege gha und vill nastüechli mitnäh zum d'träne usem gsicht butze. :-) nachem kino simmer denn no wiiter uf d'pischte.dete hämmer de Jorge (chorche) us Mexico troffe und händ ihn au no mitgno. zerscht simmer is tonic ine gange. ja guet vill isch ja ned los gsi. simmer nachere stund halt weder use und no es bierli go näh im Speakeasy. voll easy sound isch gloffe und denn hämmers dete chli gängt. aaschlüüsend simmer no schnell is Cactus Club Cafe ade Robsonstreet gange und händ dete d'Annina und ihri Kollegin vode Schuel d'Stephanie troffe. dete hani denn en "Sugar Daddy" trunke. de isch genau so guet wie ner tönt ;) ja und nachdem d'ladies denn gange sind, simmer halt weder umkehrt und is Tonic nomal gange. d'Tüürsteher händ eus tatsächlich wedererkännt und eus prompt ineglah ohni aazstah.

ja uf jedefall hed denn de Jorge sis eigentliche date ändlich gfunde. dummerwiiis isch sie mit eme andere rächt bündig beschäftigt gsi. aber hey, weli frau cha ame mexikanische scharmör wederstah?? de junge isch unglaublich. er isch denn eifach uf d'tanzflächi übere und hed mit ihre afe plaudere. de ander typ isch sich vorcho wie ime falsche film. hed sozsäge en riiise vorarbet gleischtet. keini 2 minute spöter isch de Jorge mit sim "date" dusse und de ander typ isch sozsäge im räge gstande :-). tja MEXICAN STYLE halt. ich und de steph sind denn nomal is speakeasy übere well de sound doch immer no huere kuhl gsi isch. am morge am 3 umenand simmer denn es taxi go sueche und öppe einisch hei. that's it.... :-)

ja und jetzt hüt isch sunntig, ich hocke im näscht inne, weiss ned was mit de ziiit aafah und warte einisch meh druf, dass ich chan is KEG go ässe. oh das werd de hammer. 

Morn fangt mini letschti wuche da in Vancouver aa. und denn heissts am sunntig weder heiflüüüge. ja es freut mich einersiiits weder heizchöne, anderersiits chönt ich gäbig nochli doobliiibe. dezue müssteds aber no chli anderi umständ siii und gwüssni sache und persone müssted da sii, aber suscht chönti mich as läbe da äne würkli gwöne. chillig, gmüetlich, d'lüüt sind fründlich und hesch eifach fun. esch en hammer ziit gsi bis jetzt und freu mich jetzt no die letschti wuche da i vollne züüg gnüsse zchöne. 

cheers und bes bald

no 3 Wuche

Es gahd nümme lang und denn bini scho weder ide Schwiiz. Genau jetzt am Mittag vom 29. Septämber 2008 werd ich weder Schwiiizerluft gnüsse usem Grossstadtdschungel vo Züri :-). 

Aber ja es isch ja noni so wiiit und drum redemer zerscht mal vode Vergangeheit und was ich so erläbt han. Die letscht Wuche isch eigentlich rächt locker gsi, aso irgendwie au doch ned. Am mäntig hämmer einisch meh en Fiiirtig gha darum kei schuel. Was ich am Mäntig gmacht han, wüssed er ja scho und wenn ned, denn gönder mal im letschte Blogiiitrag go schnüffle, dete stahd alles fiiinsüüberlich beschribe. D'Wuche isch rächt schnell verbiii gange und es sind au weder einigi Lüüt heigange oder neu dahäre cho. Zum biiispiel isch d'Annina und d'Valérie da. Han die beide natürlich gad met in usgang gno und mer händ en riiise fette obig gha. eifach genial gsi. Am Samschtig isch denn d'Janine no hei, das heisst mer händ am Donschtig voll Party gmacht. de Stephan, d'Annina, d'Valérie, d'Michèlle, d'Janine und ich. ja ehr läsed alli rechtig 2 Jungs und 4 Ladies. Das hets no nie gäh da äne. hei mer händ au eine duregäh da äne. super gsi. Tanzbeischwinge und drinke was inegange isch. Das hämmer einisch meh im Republic gmacht. isch zwar en saumässig tüüüre huere laaade aber es isch eifach so geil dete. am morge am 6i hani denn ändlich de wäg is bett gfunde mit eme total läääre portemonnie. tja sh** happens. :-) 

Nach sonere partynacht hed mer natürlich ned eso vill energie für am nöchschte morge uf die 9ni id schuel zgha. und will ich ja mittlerwiile sones bequems bett han und dezue au no guet schlaafe drinne, bini halt ned id schuel. ja egal. bin afig 2 mal (inklusive em letschte donschtig) ned ide schuel gsi. vo demhär liid das no ide toleranz inne wür ich meine.

am Samschtig bini denn mit em Stephan is Kino go Babylon A.D. luege. also ja irgendwie hämmer beidi also kei plan was eus de film söll säge oder ebe ned säge. kei ahnig. bis zum schluss hämmer dänkt druuszcho, aber ca. 3 minute vorem ändi macht de ganz film irgendwie kei sinn meh. *WEIRD* chani da nume aahänke. aaschlüüsend hämmer no mit em Mohammed (mim Roomie) abgmacht zum ade EnglishBay go Shisha-Dampfe. ja das isch ja en story gsi. zerscht sind ich und de Stephan det abeglofe und händ de Mohammed gsuecht. denn isch er ned dete gsi (aaalüüte heder ned chöne, will er kei gäld ufem handy hed und s'passwort zum uflade nümme weiss). ok, de steph und ich händ denn eifach dänkt, laufemer halt weder downtown und gönd no eis go näh. ich meine Vancouver isch ja ned mega super riiisig aber meh als 10 strasse heds also scho :-). aber nei, ufem wäg uf downtown lauft eus de Mohammed entgäge und denn simmer weder umkehrt und händ eusi Shisha doch no chönne gnüsse. D'Wält isch bekanntlich chli und irgendöpper hed eifach welle, dass mer de Mohammed halt no träffe. (dezue chund no dass mer ihn fascht ned gsehd im dunkle ;D)

Am Sunntig morge hani mech weder chöne dezue überringe zum go seckle zgah. hed ächt guet tah muess ich säge. Am abig bini weder einisch is KEG - Steakhouse - go ässe. OMG (Oh my God, für alli wo OMG ned verstönd), es isch göttlich gsi. han es filet classic gno. läck wiene Schwiiizerschoggi ischs uf minere zunge verloffe. heieiei. dete bini ned s'letscht mal gsi. han extra de ganz tag nüd gässe zum s'filet no meh chöne gnüsse. es hed sich also glooned. 

so jo das wärs denn für de augeblick. mälde mi spöter nomal miteme foti vom "NY Classic Steak" und em "Filet Classic". s'Wasser werd euch im Muuul zämelauffe säg ich euch. :-)

euche Stony-Malony us Downtown Vancouver

best Weekend in Vancouver

So ich han ja weder mal einiges erläbt a dem Weekend. 

Wie immer zerscht d'Bilder für die wo ned gärn wänd läse und lieber luege. Bilder säged ja bekanntlich meh als 1000 Wort.

Bilder:

• Seattle
• Grouse Grind
• Kayaking in Deep Cove

Samschtig --> Bilder vo SEATTLE

das Wochendi isch eifach weder mal de hammer gsi. so vill hani no sälte erläbt. zerscht ischs am samschtig mal losgange uf en Töfftrip nach Seattle. Mer sind Samschtig am morge am halbi 10 abgfahre und denn nachere guete Stund ade kanadisch-amerikanische Gränze aacho. Dete hämmer denn eine uf Mexican-Style gmacht --> links ade lange Schlange vo Autos verbiii und voreinnedrücke. :-) denn hämmer de aber trotzdem no en Stund ade Gränze verbracht. Ich han mit mim kanadische Pass natürli kei Problem gha. Aber min Kamerad us Dütschland (Fabian) mit sim EU-Pass. Er hed denn es Foti dörfe go mache, sini Fingerabdrück gäh, und sone Fötzel usfülle und denn hämmer chöne wiiterfahre. Denn simmer de nach total 3 Stund in Seattle aacho. mer händ natürli bombe Wätter verwütscht und händ das usgnützt zum uf de Seattle Tower zgah. Dobe hämmer denn en mega Ussicht gha über Seattle. Genial. eifach genial.

Leider hämmer echli wenig Ziit gha dete soscht wäremer denn dur d'nacht heigfahre was cheibe chalt worde wär. ufem Retourwäg simmer denn is absolute Outlet-Shopping-Mekka gange womer sich überhaupt chan vorstelle. Wenn öpper mal im Glattzentrum gsi isch, de stellt sich das mal vor und vervillfachts mit em Faktor 3 und denn hed mer öppe en aahnig wie gross das isch. Denn sind d'Priiise no so öppis vo unverschämt tüüüf, dass mer gar ned anderscht chan als ned go shoppe. mal en chlini Uswahl was es dete so alles gid a Marke: Nike, Adidas, Puma, Ralph Lauren, Tommy Hilfiger, Guess, Sony, Burberry, DC, Dikies, Kenneth Cole, Converse,.... und und und. 

Uf em Heiwäg hämmer de geilschti Sunneundergang erläbt womer als Töfffahrer eifach nome cha erläbe. En Strass wo eifach schnuergradus gahd, links und rächts heds nume en Wiese und dehinder Bäum wo zu dere ziit total schwarz usgseh händ wägem Schatte vode Sunne und denn de schwarz-blau-gälb-rot-wiiss Himmel mitenere füürrote Sunne uf de linke Siiite. Eifach nome WOW. Leider hani vo dem keis Foti chönne schüsse willi ja ufem Freeway gsi bin. Am 10 am Obig simmer denn weder in Vancouver aacho.

Sunntig --> Bilder vom Grouse Grind

Am Sunntig bini mit em Mohammed weder einisch uf Deep Cove hindere gange zum en Donut ässe und euse Kolleg us Mexiko (de Alex) närve :-) Mer händ denn welle go Kayak fahre, hed aber natürlich bi dem Bombewätter eifach kei Platz meh gha. mer 

händ denn aber für de Mäntig eis chöne reserviere. Da mer ned gwüsst händ was met de Ziit afange simmer eifach chli umegwatschled und händ chli Brainstormed was mer chönted mache. denn simmer uf d'Idee cho, dass mer eigentlich Ziit hätted uf de Grouse Mountain zgah. Wer ned weiss was de Grouse Mountain isch, de sött mal uf Vancouver gah und de Grouse Grind mache. 1000 Höhemeter uf ca. 2-3 Kilometer "Wanderwäg" verteilt. Wenn ich Wanderwäg i Aaafüerigs- und Schlusszeiche setze hed das sin gueti Grund. Es isch nämmli ned en Wanderwäg, es isch meh chlättere. mer sind denn nach 60 Minute obe aacho. Total uf de Frässi, aber erliechtered womer die Ussicht gseh händ. Dobe simmer denn eifach nochli umegwatschled und händ chli umegluegt was es so gid. Lumberjack-Show, Skilift fahre, Holzskulpture und eifach Föteli schüsse. 

Mäntig --> Bilder vom Kayak paddle

Am Mäntig (mer händ en Bankholiday gha, darum kei Schuel und Ziit für "besseri Sache":D) simmer denn am Mohammed sin Geburi go fiiire meteme schöne Kayak-Trip in Deep Cove. Es isch ja sooo geil gsi. Zerscht hämmer rächt Müeh gha das Kayak z'stüüre aber nach es paar Minute hämmer denn de Trick dusse gha wies gahd. Mer sind denn chli ade Küschte entlang paddled und händ die sehr kuhle und tüüüre Hüüser betrachted, Tier hämmer au no paar gseh (ich glaube es sind Robbe gsi, bi kei Tierkänner). Gnüssed eifach ines paar Stund d'Bilder wo ich ufelade. für alli wo Facebook händ, dete sind d'Fotis scho druffe. uf minere Siite chömeds hüt obig denn. 

Das wärs gsi. bis bald weder einisch. Cheers

 

Status nach 7 Wuche

so da bini weder einisch. also han ja scho einiges da erläbt wie ier alli sicher mitbecho händ. bin letschti ufeme Bootcruise gsi im "Harbour" vo Vancouver. isch hammer geil gsi. Party, Sightseeing und Fun alles kombiniert. händ paar ganz kuuhli hüüsli gseh und so wiiter. 

da sind d'fotis vom Bootcruise

denn bini am friitig no am BC Lions Game gsi. Das isch Canadien Football (ned American Football). Es sind praktisch die gliche regle, aber doch echli anderscht :-). au da hani natürlich einigi fotis gschosse. lueged sälber was mer dete so erläbt händ. Sie händ zwar verloore, aber es isch glich geil gsi, das mal zgseh. 

da sind d'fotis vom BC Lions game

geschter simmer eifach chli in Deep Cove unde gsi am Frisbee spille. voll easy. und am obig hämmers denn nochli chillt. hüt hängis eigentlich deheime, wills ja nume rägned. aber egal.

und da sind eifach no es paar fotis vo de letschte wuchene

so das wärs denn aber au scho weder vo mier. wünsche euch en gueti ziiit und ja mer gsehd sich denn hoffentlich bald emal weder einisch ide schwiiiz.

Alles gueti us Vancouver Downtown.

updates

ja was isch denn so los gsi da äne in Vänkuver?? hmm also zerscht bini letscht wuche mal es tattoo go mache. han mer min name uf saudi arabisch inechritzle lah, demit ich au im vollrusch ine min name ned vergisse. ja okay ich chan ned arabisch läse aber es wär doch vell zoffesichtlich und z'langwilig gsi min name i normale buechstabe iiiztättooviere. also das hämmer abghögled. ja samschtig bis und mit geschter hämmer reiewiiis abschiedsparties gha. unglaublich. jede isch irgendwie gange jetzt simmer no 3 lüüt ide homestay vo ursprünglich 7. aber es sölled anschienend 2 kanadier cho wo eifach es zimmer bruuched. ja die chönd denn mis ha, will ich zügle hüt ines grössers zimmer mit vorallem eme grössere bett. das isch also super. hani mal chli meh platz für mich und es isch eifacher. suscht gits eigentlich ned so vill zbrichte. bin gad ime huere klinsch was ich so ade weekends söll mache. de araber fragt mi die ganz ziiit wäge victoria. ich han aber ned umbedingt es riiisigs bedürfnis det übere zgah. will ich wett ja no go töff fahre da, go skydive, ufes partyboot, und no anderi sache. und ja irgendeinisch isch kei platz meh für irgendwas. mal kucken was es so häre gid.

am friitig gang ich mit em Alex (en roomie) as BC Lions Game (CFL - Canadien Football League). das werd sicher geil. mal kucken was die so mached und wie das so isch zum kucken.

suscht gits eigentlich nüme so vill zum brichte. cheers. lade demnächscht denn no fotis ufe.

gruess us Downtown Vancouver

so da isch de Teddybear :)

So bitte Leute, da ischer, de Teddybear :)

fotigrafiert mit em iPhone, darum d'quality ned sensationell. aber es isch en reale Teddybear

Achtung: Bääär!!!

ja er wärdeds ned glaube, aber hüt isch bi eus en Bär um d'hüüser umegschliche. mer händ ihn sogar gse und au no föteli gmacht. er hed öppe en schulterhöchi (gschätzt) vo 1.10 gha. also ja no en aaständigi grössi so für de erschti kontakt met eme wilde Bäär. er isch mega härzi gsi, aber leider mega schüüch. vo streichle heder garnüd welle wüsse. guet, ja es isch ja au kei teddybär, aber hed glich mega süess usgseh wi de defozottled isch. vorher heder no es cheibe chaos veraastaltet. öppe 30 lüüt sind uf de bei gsi und bime nachbar vo es hed de bär de güsel umgstosse und hed nach ässe gsuecht. denn isch de bär dem dure garte spatziert und dise hets nedemal mitbecho. unglaublich. mer händ de gad welle euses schlichwägli näh für an strand abe. aber ebe. dete isch denn halt de bär eus zuvor cho. hämmer halt useumemüesse.

bilder folged denn no.

Byebye Chaparrito

Da sind d'Bilder vom Alan aka. Chaparrito (kleiner Mann) siner Byebye-Party:

-> BYEBYE CHAPARRITO

---------------------------------

so ja ich han weder einiges erläbt. die wuche isch mal ned so grausam vill los gsi. am mäntig und zieschtig bini mit mine kollege vode homestay is Cambie gange und han mal richtig usgiebig aagstosse uf die letschte Täg vom Alan Garcia aka. Chaparrito = Kleiner Mann (er isch nome öppe 1.50 gross. en richtige Mariachi halt :D). ja denn simmer dete jewiels bis am morge am 4i am umesumpfe gsi under de wuche. und denn met halt echli wenig schlaf und liecht übernächtigt id schuel. aber egal. han glich chöne ufpasse.

ide schuel hed sich einiges verändered. die wuche sind einigi Graduations (Diplomübergabe) gsi a eusere schuel. das heisst es gönd öppe 20 persone vo 100. aber ja egal. chömed ja immer weder neui. eusi klass hed sich au verändered. die beide Koreaner wo mer ide klass händ bzw. gha händ (jetzt), händ d'klass verlah, wills rächt müeh händ am lehrer zfolge und ihn au ned verstönd. isch echli schad aber es hed au sini vorteil. jetzt chömer 3 mal schneller vorwärts mache, de lehrer cha besser uf eus iiigah und velecht liid am schluss sogar nochli ferie drinne oder so. wer weiss. uf jede fall machemer jetzt echli meh ADVANCED Business. das isch also ideal för mich. wird ich echli meh gfordered.

vill meh neus gits leider ned. bi eus schiffeds momentan echli vill -> Rainkouver trifft also voll iii :-) hehe. ja aber morn und am Mäntig sötts über 30 Grad warm wärde.